Novotel Marsa Alam Beach Resort

الفندق رائع كل حاجه كويسه واحنا مبسطين جدآ المطعم كويس جدا والاكل حاجه وهم وفاكها كتير والنسبه للبحر والشط فهو كويس جدآ ونظيف والبرات كويس جدآ انما بنسبها للترفيه والانيمشن دول حاجه حلوه جدٱ كانو فعلاً فريق بينشر السعدا كانو حاجه كويس وشكرآ لكم

هتكلم عن المميزات الاول و هو ان الاوتيل نضيف جدا الموظفين هناك بشوشين جدا و لما بنطلب اي طلب بصراحة مش بيتأخره احنا كنا حاجزين اوضة sea view و لما اسكنا كانت بعيده عن البحر شوية ف طلبنا اننا نغيرها و غيرهولنا بواحدة اقرب تاني يوم علي طول اول لما فضيت، البحر صخري و فيه ممشي طويل تنزل منه بس علي مدار ال ٤ ليالي كان البحر غير مستقر و كانوا رافعين الراية الحمرا و مفيش نزول و الشط ماتقدرش تنزل منه لانه صخري و فيه مد و جزر. نيجي بقي للعيوب: آولاً: وصلنا الساعة ١٠ الصبح و اتسكنا خلال نص ساعة بس اللي قفلني اول لما وصلنا ان محدش وصلنا للاوض زي ما متعودة في الفنادق اللي بنطلعها ال bellman وصفلنا المبني و رقم الاوضة و قالنا روحوا انتوا وانا هبقي احصلكوا بالشنط ف سآلته ليه مفيش جولف كار؟ قال انها بايظة 🙄 ف روحنا احنا الاوضة لوحدنا و دورنا علي الاوضة. ثانياً: الاوضة اللي روحناها كانت مفصلات الدولاب مفكوكة و اوكرة باب الحمام طلعت في ايدينا و كلمناهم و جابوا حد صلحها. ثالثا : الاكل هناك بشع بمعني الكلمة، اولا مفيش تنوع نهائي و اللي بيتبقي من الغدا بيتحط في العشا!! و الاكل ملهوش طعم نهائي انا في وجبات كتير مكنتش باكل فيها حاجة من كتر البشاعة! يمكن وجبة الفطار هي الوحيدة اللي كويسة عشان هي basic زي كل الاوتيلات و الاكل اللي بيخلص مابينزلش منه تاني و طبعا الاكل بيخلص بسرعة عشان عدد النزلاء كبير. ركن المكرونات بيبقي حاططلك المكرونة وايت صوص و الريد صوص علي جنب و انت اللي تغرف منهم و طبعا بيبقوا باردين و مفيش حد واقف اصلا عشان يعملك غيرها او حتي يسخنهالك، كذلك البيض المقلي معمول و محطوط كله فوق بعضه وانت خد منه و طلبت من الشيف اللي واقف يعملي واحد قريش مارضيش و قالي اللي محطوط ده لسه طالع حالا وانا مبحبش اكل البيض بارد! العصاير و الكولا كلهم كأنك بتشرب مياه مفيش اي طعم نهائي و علي الرغم ان في ماكينات قهوة في كل الاوتيل بتعمل اسبرسو و كابتشينو و لاتيه و نسكافيه بس استغفر الله الطعم لا يمت للقهوة خالص رابعاً: الهاوس كيبينج في يوم جيه متاخر علي الساعة ٣ عشان ينضف الاوضة كنا طلعنا و بنريح شوية و ادانا الفوط الجديدة و مشي عشان ماقدرناش اننا ندخله. اليوم اللي بعده السرير كان كله فتافيت و رمل و مش متنفض يا دوب بس هو شد الملايات و خلاص اليوم القبل الاخير لينا في الاوتيل لاقيت حد من ال geust relation بتكلمني عشان نحجز في مطعم ال a'la cart و كان مطعم ايطالي بصراحة الاكل فيه كان وهمي و حلو جدا يعني لو كانوا يخلوا الاكل اللي في الاوبن بوفيه بنفس المستوي كان هيبقي حلو اوي. خامساً: في عنصرية كبيرة جدا بين المصريين و الاجانب و ال VIP يعني بيهتموا بالاجانب اكتر في كل حاجة و كمان لاحظت ان الاجانب اللي بيعملوا check out بيدوهم و هما ماشين souvenirs المصريين لا بل بالعكس حصل موقف واحنا بنعمل check out كان في حد vip هو و اسرته كل ال stuff حرفيا بما فيهم مدير الفندق كانوا واقفينله صف و الشنط اتحطت في عربيته و فضلوا واقفين صف بيعملوله باي لحد ما مشي بالعربية و في ثواني مدير الفندق راح مكلم بنفسه البوابه عشان يفتحهواله و مايفضلش واقف في حين اننا الساعة ٨ الصبح قبل ماننزل الفطار كلمت الريسبشن و بلغتهم اننا هنفطر و هنمشي و محتاجة حد يجي ياخد الشنط من الاوضة عشان علي ما نخلص فطار نعمل check out و نمشي علي طول و قالولنا حاضر، نزلنا فطرنا و روحنا عملنا check out و فضلنا مستنين شنطنا تيجي من الاوضة نص ساعة تقريباً لحد ما الراجل المهم مشي لدرجة ان كان في اسرة مصرية والله جابوا شنطهم بنفسه

الفندق جميل جدا الاستاف بيعملوك بتريقه كويسه و الاكل جميل و البحر و البسين و الرحلات جميله و اجواء الفندق و الغورف و الشوا بيبقا جميل جدا و في عروض مختلفه و تيم الشوا روش و لزيز في التعامل مع الناس و الجواء مريحه